NATIONAL NEWS– Nagpapabilin la gihapon nga apektado han African Swine Fever(ASF) an 48 nga probinsya ha bug-os nga Pilipinas, subay ine ha pinaka-urhi nga report han Bureau of Animal Industry (BAI).
Nagawas ha report han National ASF Prevention and Control Program nga apektado han ASF an 3 nga probinsya hiton Ilocos, 5 ha CAR, 4 ha Region 2, 6 ha Central Luzon, 4 ha Calabarzon, ngan 3 ha Mimaropa.
Ada naman ha lima nga probinsya ha Bicol Region an nagpapabilin nga apekatdo han ASF; 5 ha Western Visayas, 3 ha Central Visayas, 4 ha Eastern Visayas, tag -2 ha Zamboanga peninsula ngan Northern Mindanao, 5 ha Davao, 2 ha Soccsksargen ngan 5 ha Caraga.
Ha kaluyo han epekto han ASF ha mga nasabi nga rehiyon, ginmalatumat han BAI nga mayda 453 nga siyudad an ada ha kategorya nga pink area o buffer zone.
Umabot na gihapon hin 99 nga munisipalidad, an naideklara kumo yellow o surveillance zones ngan padayon nga ginbabantayan hiton mga otoridad.
Ginsigurado naman han BAI, nga padayon ine nga maghihimo hin pamaagi agud nga mabantayan an mga lugar ha bug-os nga nasud, ngan magin talwas ha ASF ngan mapabilin nga dire apektado an mga ine ha nasabi nga virus.
