TACLOBAN CITY – Maabot na ha 40 nga mga tourism sites ha Sinirangan Bisayas an nakarawat na hin mga turista tikang ha iba nga rehiyon.
Sumala kan Dir. Karen Tiopes, Regional Director Department Of Tourism Regional Office 8, han nakalabay la nga semana han magpagawas hin Executive Order an magkadirudilain nga probinsya ha rehiyon nga naakseptar na hin domestic tourists.
Kalakip ha mga ini an mga probinsya han Biliran, Southern Leyte, Eastern Samar, sugadman an mga syudad han Tacloban, Ormoc, Borongan ngan Catbalogan.
Nagtutuo naman an mao nga opisyal nga pinaagi han uniformed travel protocols ha tanan han mga LGUs in magiging masarusayon na an pagbyahe ngan sugadman dako an maibubulig hini ha hinay-hinay nga pagbuhi han turismo ha rehiyon.
Nanawagan naman ini ha publiko nga ha kaluyo han mas ginpahuruhukal nga travel protocols in dire la gihapon kalimtan nga magsunod ha mga standard health protocols sugad han pagsusul-ot hin face mask, face sheild ngan pag-obserbar han physical distancing agud nga dire na humitaas pa an ihap han COVID-19 cases ha rehiyon.
