TACLOBAN CITY– Nagkamayda hin enkwentro an 3rd Infantry Battalion kontra ha mga walhon nga grupo ha Barangay Cagtoto-og, San Jorge Samar.
Sumala kan Cpt. Christopher Tataro Division Public Office 8ID Philippine Army, naka-engkwentro nira an mga Communist-Terrorist Groups (CTG), samtang nagdudumara hin security patrol ha bisinidad han nasabi nga barangay, han tigda la an mga ine makabati hin buto hiton pusil, ngan dayon nira nga ginpanginano an gintikangan hine agud nga masigurado an katalwasan han komunidad.
Ha pag-abot nira ha lugar kun diin nagtikang an buto hiton pusil, in didto naabtan nira an 5 nga miyembro han walhon nga grupo, kun diin dayon hira nagkamayda hin balyuay hiton buto han pusil.
Ha kabutngaan han engkwentro kumalagiw an mga walhon nga grupo kun diin ginpanbayaan hine an ira mga armas.
Nakuha naman han kasundaluhan an pira nga mga higtaas nga kalibre hiton pusil, ngan mga importante nga dokumento.
Wara naman may nasamaran o namatay ha kampo han kasundaluhan, ngan dayon naman nagdumara hin pursuit operations, agud nga matudlok an lugar kun diin an mga CTG kumalagiw, ngan mapugngan an ira pan-aghat ha publiko nga maki-usa ha ira.
Ha pagkayana, padayon an ginhihimo nga security operation han kasundaluhan, agud nga masigurado nga talwas an seguridad han mga residente ha nasabi nga lugar ngan magin han kahagrani hine nga barangay.
