TACLOBAN CITY — Gintikangan na han Department of Social Welfare and Development (DSWD) an panhatag han tag P5,000 nga Presidential Financial Assistance para ha mga biktima han bagyong Yolanda.
Ada ha 206 nga mga benepisyaryo nga nagtikang han Brgy Salvacion, San Agustin ngan Sugka han Basey, Samar an nagpakakarawat han tag 5 mil pesos.
Sumala kan Theo Felicis, admin officer han Disaster Management Unit han DSWD, nga an magpapakakarawat la han mao nga financial assistance adton mga waray pa makakarawat hin Emergency Shelter Assistance (ESA) ngan bisan anu pa nga bulig tikang ha gobyerno.
Basar ha datus han DSWD, 3,357 households pala an natatagan han mao nga ayuda ha bugos nga rehiyon ngan may-ada pa 37,802 nga pamilya an makakakarawat hini.
Ginklaro naman hini nga an mga nag uukoy na yana ha pabahay han gobyerno in diri na lakip ha mao nga financial assistance.
