Usa nga 12-anyos nga bata nga babaye an nagpakalas ha mga lokal nga otoridad ha Brazil mahuman mahibaruan nga ginpeke hini an iya kalugaringon kidnapping agud makakuha hin dako nga kantidad hin salapi ha iya mga kag-anak.
Nagtikang an panguwat hini banda ala-1 han maagahon han tigda nga mawra an bata ha ira balay ha bungto han Itaipolis. Samtang, nawawara, nagpadara hiya hin mga serye hin text messages ha iya pamilya kun diin nagpanggap ini nga ginkidnap hiya. Agud magin matuod-tuod, iginpirit hini nga padayon hiya nga nakakakarawat hin mga panarhog ha kinabuhi ngan ginpapasakitan hiya han mga nagpakilala nga kidnapper.
Mahitungod ha duro nga kahadlok para ha kinabuhi han ira anak, dayun nga nangaro hin bulig an kag-anak hini ha pulisya. Dayon naman nga naglunsar hin mahugot nga imbestigasyon an Criminal Investigation Division ha kahirani nga syudad han Mafra agud masalbar an biktima. Pag-abot han alas-11 han aga, utro nga nagpadara hin mensahe an bata nga babaye agud pormal nga umaro hin ransom money
Pero ugsa pa man makagtirok hin pondo an pamilya, malinagpuson nga natad-an han kapulisan an eksakto nga lokasyon han bata ha usa nga rural nga lugar ha gawas han ira syduad. Ginsulod han mga special unit an balay kun diin nira na-track an gintitikangan han text messages, pero dako an ira kalas han matad-an nira an bata nga nag-uusaan, talwas, ngan waray anuman nga pilas.
Ha gindumara nga interogasyon, gin amin mismo han bata nga himo-himo la niya an bug-os nga insidente agud makakuha hin salapi ha iya pamilya. Dayun hiya nga ginbutang ha kostudiya han mga otoridad para ha kaso nga extortion, sugadman dire pa klaro an sigurado nga legal nga sirot mahitungod ha iya bata nga edad.
