TACLOBAN CITY – Maabot ha onse nga mga kabablayan ngan usa nga merkado publiko an nadistroso mahuman nga maigo hin ipo-ipo an tulo nga barangay ha bungto an Lavezares ha Northern Samar.
Sumala kan Bejoy Cadampog, han MDRRMO Lavezares, humagos la hin pira kaminutos an mao nga pag-igo han ipo-ipo pero nakuha hini nga madistroso an mga kabablyan ha tulo nga coastal barangay ha Libas, Cataogan, ngan San Miguel ha mao nga bungto.
Dugang pa ni Cadampog nga ugsa nga umigo an ipo-ipo in nagkaada anay hin makusog pag-inuran ha mao nga lugar.
Dayon naman nga nagkaada hin clearing operation an mga otoridad ngan ha pagkayana in nakabalik an mga apektado nga residente ha ira mga panimalay.
Waray naman may nahipatik nga samaran o naawatan hin kinabuhi ha mao nga panhitabo.
Ha pagkayana padayon nga gintutudlok han Provincial Agriculture’s Office an kabug-usan nga danyos nga naidurot hini nga pagtaga ipo-ipo.
