Utro nga iginduduso ha senado an pagpasa han Senate Bill 1625 o an West Philippine Sea Education Act mahuman an mga pamahayag tikang ha Chinese Scholar nga kaparte han teritoryo han China an Batanes.
Sakob ha mao nga balaodnon an pag mando ha Department of Education (DepEd) nga maghimo hin kaangayan nga training para ha mga magturutdo ngan instructors ha West Philippine Sea (WPS) Education.
Sumala kan Senator Erwin Tulfo, kun ini in mahihimo nga balaodnon, mailalakip ha learing materials an gin kikilala nga 2016 Arbitral Ruling nga gin tatag-iyahan han Pilipinas an WPS, mga desisyon han Supreme Court, ngan mga balaod han bansa.
Gin tagan duon han senador an panginginanhanglan hin madagmit nga aksyon agud masigurado nga diri madagmit mauuwat an mga Pilipino kasumpay han pag-angkon ha WPS.
Dugang pa hini, importante nga ha Basic Education pala in maaram na an mga Pilipino ha mao nga iristuryahon.
Kasunod hini, in gin kondena ni Tulfo an mga nangin pahayag ha pag-aangkon han mga Chinese scholars ha Batanes kumo kaparte han teritoryo han China.
Subay hini, usa nga pahimatngon an sunod-sunod nga pag-angkon han China ha teritoryo han Pilipinas ha mismo nga anibersaryo han makasaysayan nga 2016 Arbitral Ruling nga pumabor ha nasud Pilipinas.
Gin tagaduon pa ni Tulfo, nga an pagkakaada hin hibaro ha teritoryo han nasud in diri la iristuryahon ha pagigin makabayan, kundi usa hiya nga pratikal nga pamaagi agud ipasabot ha mga Pilipino an gin tatag-iyahan han Pilipinas. Diri la ha teritoryo kundi magin ha mga bahandi han nasud.
