Gin pahayag ni Manila Rep. Bienvenido Abante Jr. ha House hearing nga dire pwede tungaon an pagkatawo ni VP Sara ha iya trabaho kumo bise presidente ngan anay DepEd secretary.
Dugang pa ni Abnate, subay ha “single personality doctrine,” an mga aksyon ni Duterte kumo DepEd chief in kaparte gihapon han iya obligasyon kumo bise presidente, sanglit an impeachment case in kinahanglan nga nakabase ha iya kabug-usan nga trabaho ha pampubliko nga serbisyo.
Ini an nagin baton ha pahayag ni Cagayan de Oro 2nd District Rep. Rufus Rodriguez, nga kumwestyon ha hurisdiksyon han House Justice Committee ha mga aksyon ni Duterte kumo anay DepEd secretary.
Ginmalatumat naman ni Bukidnon Rep. Jonathan Keith Flores, vice chair han komite, nga kinahanglan nakapukos an mga membro ha “sufficiency in substance” han ikaupat nga impeachment complaint, ngan an desisyon kun gagamiton ni Duterte an iya depensa kumo DepEd secretary in depende na ha iya.
Gintagan-duon nira Reps. Joel Chua ngan Abante nga an pagigin DepEd chief ni Duterte in nakabase ha iya pagka-bise presidente, subay ha 1987 Constitution, ngan dire pwede ig bulag ha impeachment proceedings.
