NATIONAL – Ginmalatumat ni Vice President Sara Duterte nga daw nakigsabwatan an administrasyon ni Presidente Ferdinand Marcos Jr. ha International Criminal Court (ICC) agud ig paaresto an iya tatay nga hi anay presidente Rodrigo Duterte, kasumpay ha kaso nga crimes against humanity maypaghisumpay ha iya war on drugs.
Ha iya pahayag ha Free Duterte Now rally ha The Hague, iginduon ni VP Sara nga mayda political motives ha luyo han pagkaka-aresto ha iya tatay dida han Marso 11 ha Pilipinas.
Daw an ICC ngan an presente nga administrasyon in nagkuntsabahay agud tanggalon ha eksena an anay presidente nga usa ha mga pinaka-vocal nga kritiko ni PBBM.
Sumala pa hine, waray sakto nga basaranan an pagkakapreso han iya tatay ha Scheveningen Prison ha The Hague, ngan an an mga akusasyon daw han extrajudicial killings (EJK) in basar la ha mga tsismis.
Nagdig-on gihapon ine nga an ICC in nakikialam ha gobyerno han Pilipinas ngan mayda kalugaringon nga agenda agud mapabilin an suporta ngan pondo tikang ha iba nga nasud.
Samtang, bumaribad naman an ICC spokesperson nga hi Fadi El Abdallah nga maghatag hin komento ha mga pahayag ni VP Sara ngan iginduon nga an ICC in usa nga judicial institution, ngan an anuman nga isyu in kinahanglan nga igdaop ha mga huwes ha korte.
Gin akusaran naman gihapon ni VP Sara hi Presidente Marcos nga nagkukunwari nga buutan ha publiko.
Dugang pa hine, waray hiya nakikita nga malinampuson nga proyekto han presente nga administrasyon.
Padayon gihapon an panawagan hine para ha dayun nga pagpapagawas ngan pagbabalik ha nasud han iya tatay, kadungan han pagduon han katungod han mga Pilipino nga magdesisyon paras ha ira nasud.
