TACLOBAN CITY – Nagdumara hin duha ka-adlaw nga validation an City Social Welfare and Development Officer (CSWDO) han Tacloban dida han Marso 25-26.
Panuyo hini nga ma-validate an mga kwalipikado nga Motorcab-for-Hire (MCH) operators o drivers para han tag-P5,000 nga fuel subsidy tikang ha national government.
Sumala kan Tacloban Unified Motorcab for Hire Drivers and Operators Association President, Edgardo Waniwan, ada ha sobra 1,800 an kabug-usan nga ihap han mga benepisyaryo an nakatalaan nga maka-avail han subsidiya ha lana pero mayda 280 ha mga ini an waray makagpa-validate mahitungod nga waray makakadto.
Dugang pa hini, dire pa gihap hira maaram kun makuha pa han 280 nga indibidwal an ira subsidiya mahitungod nga naghuman naman an validation.
Pero ginmalatumat ni Waniwan nga an sigurado nga dire gud makakakuha han subsidiya in adton mga waray pa makagpa-renew han ira rehistro yana nga 2026.
Nagtikang an lista han mga kwalipikado nga benepisyaryo ha Business Permit and Licensing Division han syudad agud masigurado nga an matatagan hin bulig in an mga lehitimo ngan nagsusunod nga mga operators o drivers.
Nakatalaan naman nga ig-release an fuel subsidy ha mga benepisyaryo kahuman han Semana Santa 2026.
Ha lain nga bahin, gin klaro ni Waniwan ha iya pamakiana ha CSWDO nga dire makakakarawat an operator han sarakyan, lugod an driver hini an makakabenepisyo. Pero kun usa ini nga operator ngan ini gihapon an nagmamaneho han iya sarakyan in makakakarawat ini.
