NATIONAL NEWS- Ginpagawas na han Department of Budget and Management (DBM) an urhi nga balanse han health emergency allowance para ha mga healthworkers nga nagsirbi han nakalabay nga COVID-19 pandemic tikang han 2021 – 2023.
An nasabi nga kantidad in sakop an 1,411,546 claims tikang han nasabi nga mga tuig, ngan ginhuhulat han mga Local Government Units (LGU), private health facilities, state universities ngan pira na mag institusyon ha magkalain-lain nga rehiyon.
Ginmalatumat ni Budget Secretary Amenah Pangandaman nga aprubado na an special allotment release order (SARO) han Department of Health (DOH).
Ginkuha an pondo tikang ha Strengthening Assistance for Government Infrastructure and Social Programs (SAGIP) ha ilarom han mga unprogrammed appropriations han 2025 national budget.
Ine na an urhi nga parte han Public Health Emergency Benefits and Allowances (PHEBA) nga obligasyon han gobyerno.
