Nagpahimatngon ni Transportation Secretary Banoy Lopez ha mga korap nga tawuhan han Office for Transportation Security (OTS) ngan igin-mando an mas mahugot nga pagbabantay ha mga paluparan kasunod han eport han pangawat ha mga pasaheros.
An pitad in kumo baton ha kamanduhan ni Presidente Ferdinand Marcos Jr. nga siguraduhon nga tangkod ha serbisyon an mga airport personnel, labi na ha ginlalauman nga pagdamo han mga biyahero tikang ha mga probinsya ngan iba nga nasud.
Kadungan hini, dayun nga iginmando ni Lopez an pagtanggal ha pwesto ha duha nga Security Screening Officers (SSO) ngan usa nga supervisor ha NAIA Terminal 3 samtang gindudumara an imbestigasyon.
An nasabi nga mga opisyal in naatubang ha mga kaso nga kriminal ngan administratibo kasumpay han nawawara nga P7,000 ngan NTD 1,000 tikang ha usa nga pasaheros nga Australyano di pala maiha.
Ginmalatumat ni Lopez, nga ha oras mapatud-an nga mayda mga OTS Security Screening Offices nga nangunguna ha pagtalapas han balaod, kaupod an pangawat han gamit o salapi han pasahero, in sigurado nga mayda kamumutangan an mga ini ngan magbabaton ha balaod.
Sumala pa ha sekretarya, dako an responsibilidad han mga SSO nga siguraduhon an katalwasan han mga pasaheros ngan pugngan an pagpasulod han mga igindidire nga kargamento, sanglit dire makaru-karawat an anuman nga hugaw han korapsyon.
Ginpahinumduman gihapon ni Lopez an mga pasaheros nga dayun igreport an anuman nga kaduda-duda nga gios han mga tawuhan han paluparan.
Gin abisuhan hini an publiko nga likayan nga magdara hin mga kontrabando agud dire na kinahanglan nga abrihan an ira mga bagahe.
