HILONGOS, LEYTE – Ginkokonsidera na nga suspek an anay Person of Interest ha nahitabo nga pamusil ha Brgy. Uwak, Hilongos, Leyte.
Manunumduman nga dida han Marso 18 in natad-an hi alyas Kudo, 39-anyos ha may tulay han nasabi nga barangay.
Sumala kan Hilongos Municipal Police Station Chief of Police, PMaj. Ambrosio Demain, basar han ira pag-alinsusunod ha kaso, nagawas nga konektado ha ilegal nga droga an insidente kun diin an ira ginkokonsidera hadto nga Person of Interest in amu na iton suspek ha yana.
Mababaruan gihapon nga han adlaw nga natad-an an biktima in nakuhaan ini ha iya bursa hin droga nga natimbang hin 73.32 kagramos, ngan nagkakantidad hin P496,576.
Nagawas gihapon ha imbestigasyon nga an suspek an nagtarhog han biktima mahitungod nga waray na an mga ini magkaka-asya sanglit gin unahan hini an biktima.
Padayon naman an gindudumara nga imbestigasyon han kapulisan agud magin mas mabug-at an igpapasaka nga kaso ha suspek.
