ORMOC CITY – Sumaka na ha lima katawo an namatay ha nahitabo nga disgrasya ha karsada han Brgy. Cabulihan, Ormoc City, dida han Hunyo 1.
Kaupod ha namatay an usa nga katuig nga bata na nahitabo nga burunggu-ay han upat nga sarakyan.
Sumala kan Ormoc City Police Office Information Officer, PLt.Col. Ramil Amodia, an Fuso fighter truck in nagbibiyahe tikang ha Kananga ngan malaksi an padalagan hine, samtang nagbibiyahe naman an motorsiklo ngan multicab tikadto ha Ormoc City.
Basar han impormasyon, samtang nagbibiyahe ine nga mga sarakyan, kumawat hin linya an Fuso fighter truck rason nga bumunggo ine ha katapo hine nga motorsiklo ngan multicab.
Dead-on the-spot an duha nga sakay han multicab, sugadman an tatay ngan usa ka-tuig nga bata nga sakay han motorsiklo.
Nadara pa naman an nanay nga sakay han motorsiklo ha ospital pero gin bawian gihapon ine hin kinabuhi kakulop nga adlaw.
Samtang, padayon pa naman nga gintatambal ha ospital an tulo nga mga anak nga sakay han multicab.
Nadabi gihapon ha insidente an usa pa nga multicab nga nakaparada la ha ligid han karsada.
Ha pagkayana in aada na ha kustodiya han kapulisan an driver han truck ngan mag-aatubang ha kaso nga Reckless Imprudence Resulting in Multiple Homicide, Physical Injuries, and Damage to Property.
