ALBUERA, LEYTE – Mayda na natudlok nga Person of Interest an Albuera Municipal Police Station ha nahitabo nga pamusil ha Brgy. Sherwood, Albuera, Leyte dida han nakalabay nga adlaw.
Sumala kan Albuera Municipal Police Station Chief of Police, PCpt Jose Bayona, nagdumara hira hin backtracking ha mga kuha han CCTV nga nakagtudlok ha ira person of interest.
Manunumduman gudman nga dida han nakalabay nga adlaw in ginpamusil-patay an usa nga lalaki ha nasabi nga lugar samtang sakay han iya motorsiklo kahuman ig durayhag an iya mga anak ha iskuylahan.
Kun diin, dida han nagbibiyahe na ine tibalik ha ira balay—ha pag-abot hine ha lugar han insidente in tigda ine ginpamusil han suspek nga nasakay gihapon hin motorsiklo.
Nag-angkon an biktima hin igo ha may ulo—rason han dayun hine nga kamatayon, lawas, ngan kamot.
Nakuha naman ha lugar han insidente an tulo nga basiyo hin calibre .45 pistol.
Ha kaluyo hine in padayon la gihapon an gindudumara nga imbestigasyon han mga kapulisan agud masigurado nga an person of interest in amu gud an suspek.
