TACLOBAN CITY – Maswerte nga naisalbar an upat nga mga parupangisda nga upat na kaadlaw nga palutaw-lutaw ha kadagatan mahuman nga magub-an hin makina an ira sarakyan pandagat ha San Juan, Southern Leyte.
Ginkilala an mao nga mga parupangisda nga hira Jeffrey Lamac, Rocky Abenales, Jemar Loyola ngan Jonathan Jaca nga paprehos mga residente han Brgy. Buntay, Dulag Leyte.
Sumala kan Pol. Chief Master Sgt. Jaime Cadao, deputy chief of police han San Juan MPS, nagpalawud para mangisda ha kadagatan han Abuyog, Leyte an mao nga parupangisda hasta nga umabot an mga ini ha Southern Leyte kun diin nagub-an hin makina an ira sarakyan pandagat.
Nakurian nga makaaro hin bulig an mga biktima tungod han kahirayo han ira gindangatan sanglit umabot anay hin upat kaadlaw san-o hira marescue.
Lupaypay na gihapon han makit-an an mga ini nga palutaw-lutaw ha dagat tungod ha gutom ngan uhaw kun diin mga gindakop nga isda an ira ginkakaon ngan tubig dagat nala an ira gin-ininom.
Hapit na gihapon nga mabalikad an ira sarakyan pandagat han usa kagab-i tungod han makusog nga balud.
Dayon naman nga gindara ha ospital an mga biktima ngan ha pagkayana in ada na ha maupay nga kamutangan.
