PHOTO COURTESY: MARIE TONETTE GRACE MARTICIO
TACLOBAN CITY – Waray na kinabuhi han matad-an an tulo nga mga menor de edad mahuman nga malumos ha usa nga sapa ha Brgy. Balud, Arteche, Eastern Samar kakulop nga adlaw Hulyo 18.
Ginkilala an magbugto nga biktima nga hira Manilyn Pajaroja, sais anyos ngan hi Ronalyn Pajaroja, singko anyos ngan an ira patod nga hi Ma. Daisy Orosco, sais anyos an pangidaron.
Sumala kan Pol. Lt. Lysander Camacho, OIC han Arteche MPS, banda alas 10 han aga, gin-aalegar nga nangarigo ngan nagmulay an mga bata ha salog hirani ha ira panimalay kun diin hitaas an tubig hini mahitungod han pag-inuran.
Waray daw makasabot an mga kag-anak nga gumawas an mga bata ngan pumakadto ha sapa.
Banda alas-2 han kulop han mapansin nira nga nawawara na an mga ini sanglit dayon hira nga umaro hin bulig.
Napuno naman hin luha ngan kasubo ang mga kag-anak han makit-an nira an patay nga lawas han mga biktima nga naglulutaw lutaw ha mao nga sapa.
Una nga nakit-an an magbugto nga hi Manilyn ngan Ronalyn banda alas 8 han gab-i.
Gindara pa ini ha hospital pero gindeklara liwat nga dead on arrival.
Alas 10 naman han kagab-ihon han natad-an an patay nga lawas han usa pa ngaa biktima nga hi Ma. Daisy.
Nagpahimatngon naman hi Pol. Lt. Camacho ha mga kag-anak nga bantayan hin maupay iton mga bata para diri na utro nga mahinabo an sugad hini nga insidente.
