TACLOBAN CITY – Igindalagan ha ospital an tulo nga mga menor de edad mahuman nga mabiktima hin red tide poisoning ha Brgy. San Fernando Basey Samar.
Sumala kan Dir. Juan Albaladejo, Regional Director han Bureau of Fisheries and Aquatic Resources (BFAR) Region 8, usa nga nuybe anyos ngan singko anyos nga lalaki ngan usa nga otso anyos nga bata nga babaye an nabiktima han mao nga shellfish poisoning.
Nahibaruan nga nakakaon an mga ini hin ponaw o usa nga klase hin pangtion nga apektado han red tide nga daw in nakuha han mga biktima tikang ha baybayon ha ira lugar.
Dayon naman an mga ini nga gindalagan ha Eastern Visayas Regional Medical Center (EVRMC) ngan ha pagkayana in ada na ha stable nga kondisyon an duha ha mga biktima samtang nagpapabilin pa ha intensive care unit (ICU) an usa ha mga ini.
Utro naman nga nagpahimatngon an BFAR ha publiko nga likayan an pagkaon han bisan ano nga klase hin pangtion ha mga baybayon nga apektado hin red tide toxins partikula na ha Matarinao Bay ha Samar ngan Cancabato Bay ha Tacloban City.
