Karuyag batunon han Atin Ito coalition an tulo nga krisis nga ginkakaatubang han nasud kasumpay ha West Philippine Sea ha ikaupat nga civilian mission nga plano pagdumaraon ha bulan han Abril.
Ha pakighimangraw han Bombo Radyo kan Akbayan Party-List President Rafaela David, tulo kabeses na ini nga nabuhat han grupo ngan paprehas nagin malinangpuson an magkadiru-dilain nga ayat ha gin aagawan nga kagatan, sugad han presensiya han Chinese vessels ngan iba pa.
Pag-eksplikar ni David, napagdesisyunan han grupo nga magdumara utro hin misyon agud atuhan an tulo nga pangunahon nga krisis sugad han mga masunod:
Syahan, agud buligan an mga paru-pangisda nga apektado ha oil crisis dara han kasamok ha Middle East. Target han grupo nga magdara hin bari-bariles nga petroleum products ngan iba pa nga supplies ha mga paru-pangisda ha WPS.
Ikaduha, in agud mapahaluag an hibaro kasumpay ha Chinese spying activities. Sumala kan Davaid, magkakamay-ada hin mga serye hin awareness campaign kontra ha posible nga panre-recruit han China ha mga Pinoy agud mag-serbi nga espiya.
Ikatulo, agud mapugngan nga dumamo pa an mga “Tsinador” ngan posible nga supporter.
Mag iiha hin lima kaadlaw an panibag-o nga misyon han coalition nga plano pagdumaraon ha katapusan nga semana ha Abril.
Kaupod ha mga nakahan-ay nga aktibidad in an dayalogo sa ha mga residente han Pag-asa Island, pakikig-istorya ha mga paru-pangisda, pag-aram ha impotansya han WPS, ngan iba pa nga ‘patriotic activities’ nga gintuyo paghan-ay agud mapakusog pa an paghigugma han mga Pilipino ha gin aagawan nga kadagatan.
