INTERNATIONAL – Ginanunsiyo ni US President Donald Trump nga nadakop na hi Venezuelan President Nicolas Maduro nga ginkokonsidera han Amerika kumo usa nga terorista kaupod an iya asawa nga hi First Lady Cilia Flores.
Ha usa nga statement, ginkumpirma han US President nga malinampuson an ginhimo nga pag-atake han Amerika kontra ha Venezuela ngan ha lider hini nga hi President Maduro, kaupod an iya asawa nga nadakop ngan ginlupad tigawas han Venezuela.
Basar naman ha notisya han international media, ginmalatumat han pira nga opisyal nga naaresto hi Maduro han US army nga Delta Force, an top counter terrorism unit han US military kaupod an US Law Enforcement.
Ugsa an anunisyo ni Trump, nauna na nga nag-offer an Amerika hin $50M nga reward para ha makakaghatag hin impormasyon agud madakop hi Maduro.
Basar naman ha usa nga Republican Senator, ginmalatumat ni US Secretary of State Marco Rubio nga maatubang hi Maduro ha usa nga trial ha Amerika kasumpay ha criminal charges kontra ha iya ngan waray ginlalauman nga pitad kontra ha Venezuela.
Samtang, sumala naman kan Venezuelan Vice President Delcy Rodriguez, waray aram an gobyerno ha kinamumutangan yana ni Maduro o ni First Lady Cilia Flores.
