MILAN, ITALY – Opisyal nga ginkilala han Guinness World Record an usa nga Maltese chocolatier mahuman hini himuon an pinakahalaba nga chocolate sculpture ha bug-os nga nasud. An sculpture in usa nga old model nga tren nga may kahalaba nga 55.27 meters nga mas halaba pa kaysa ha Olympic swimming pool.
Ini nga obra in himo ha puro nga Belgian chocolate nga ginbubugot hin usa nga locomotive ngan 22 carriages. Kada carriage han chocolate sculpture in natimbang hin 160 kilos. Ginbida an obra ha Milan ha pangunguna han naghimo hini nga hi Andrew Farrugia, usa nga senior lecturer han culinary arts ha Institute of Tourism Studies ha Malta.
Dire ini an siyahan nga world record ni Farrugia. Tuig 2012 han himuon niya an 34.05 metric ton nga chocolate train ha Brussles, ngan dida han 2014 naman in ginhimo niya an pinakahitaas nga chocolate sculpture ha pamamaagi han 13.52 metro nga replica han Burj Khalifa ha Dubai.
Maabot naman hin bug-os nga tuig an pangandaman ngan upat ka bulan an aktwal nga produksyon han chocolate train kundiin maabot sobra 5,000 pieces han chocolate an nagamit.
Sumala ha chocolatier, an pinakamakuri nga parte han proyekto in an transportasyon tikang Bergamo pakadto ha Milan kun diin nakaulpot naman an higante nga chocolate train ha exhibit hin bug-os ngan waray ruba.
