TACLOBAN CITY–Ginhuhulat pa han Traffic Operations Management Enforcement and Control Office (TOMECO) an direktiba tikang ha nasyonal kun igpapagbawal na nga makabiyahe an mga e-trike.
Una hine, nagpagawas hin kamanduhan an Department of Transportation nga igpapagbawal na nga makabiyahe ha mga national road an mga e-trike tinikangan ha Disyembre 1, 2025.
Ha kaluyo hine, ginsusupender ine hiton Land Transportation Office (LTO) matungod nga kinahanglan la nga pag-andman ine hin maupay.
Sumala kan Restituto Reglos, Operation and Enforcement han TOMECO, nga magigin istrikto la hira anay ha National Highway ngan papagbawalan an mga ine na maka-agi ha mga primero nga karsada.
Makakasulod naman an mga ini ha downtown pero bawal an mga ine ha main road nga gin-aagian hiton mga pampasaheros nga sarakyan.
Samtang, ginduduso gihapon nira an pagpaparehistro han mga ini ngan igapailarom ha road safety seminar an mga drivers han nasabi nga sarakyan.
