TACLOBAN CITY- Nagpahimatngon an Traffic Operation Management Enforcement and Control Office TOMECO, ha mga motorista partikular na ha mga estudyante han usa nga unibersidad dinhi ha Tacloban.
Sumala kan Restituto Reglos, Operation and Enforcement Tomeco, an mga gingagamit nga single motorcycle han mga estudyante in dapat nakaparada ha sulod hiton campus, dire ha gawas matungod nga highway na ine ngan aragian hiton pampubliko nga sarakyan ngan magin hiton publiko.
Dugang pa hine, nga an ginpaparadahan mangud yana han mga estudyante, in may na-eksister nga NO PARKING, agud nga magin haluag an karsada kun diin pwede mamarada an mga pampubliko nga sarakyan kun mayda nahaw-as nga pasaheros.
An nasabi nga pamarada ha gawas in nakakag-kawsa gihapon hiton traffic kun rush hours matungod nga nakaka-ulang an nasabi nga mga single motorcycle.
Naghahangyo naman an buhatan hiton TOMECO, nga makipag-kooperar an mga ine agud nga dire umatubang hin mga penalidad.
