Gindidiri han Tacloban Traffic Operations Management Office (TOMECO) an pagparada han mga sarakyan ha atubangan han Bulwagan ng Katarungan ha Magsaysay Boulevard, Tacloban City, kasunod han direktiba han Department of Public Works and Highways (DPWH) Region VIII.
Sumala kan Restituto Reglos, Operation and Enforcement han TOMECO, ini in kasunod han kamanduan han DPWH-8 nga pahugton an pagpatuman han Department Order No. 73, Series of 2004, nga nagdidiri han paggamit han right of way han mga national road para ha pagparada han mga sarakyan.
Ginpahayag ni Reglos nga an pagparada ha nasabi nga bahin han kalsada in nakakaapekto ha trapiko ngan posible magdara hin peligro ha mga motorista tungod nasasakop na han mga nakaparada nga sarakyan an outer lane han highway.
Nagpahimatngon hi Reglos nga pwede magparada an mga motorista ha Botanical Garden o ha unhan nga bahin nga diri sakop han right of way han national road.
Ginmalatumat ni Reglos nga usa han mga hinungdan han pagparada han mga sarakyan ha nasabi nga lugar amo an kakulangan hin parking area ha palibot han Bulwagan ng Katarungan. Pero, ginpahinumduman han TOMECO an mga motorista nga kinahanglan sundon an mga regulasyon ha paggamit han national roads basi malikyan an duro nga trapiko ngan masiguro an katalwasan han ngatanan nga nagamit han kalsada.
