TACLOBAN CITY – All-set na an Traffic Operations Management, Enforcement and Control Office o TOMECO, para han pag-obserba han Semana Santa yana nga tuig.
Sumala kan TOMECO Operation and Enforcement Head, Restituto Reglos nga andam na an ira buhatan nga mapabilin nga maupay iton pag-kiwa han trapiko ngan agud malikayan an pagbugi-ot han mga sarakyan ha mga kakarsadahan durante han pamalandong han publiko.
Nagpakalatag na gihapon an ira mga plano kasumpay han pag-kiwa han trapiko ngan an mga posible nga parking spots han mga sarakyan.
Dugang pa hini nga mahugot gihapon iton ira pagbubuhaton nga pagbabantay ngan pag-asister ha mga molupyo nga mapakadto ha mga arampoan yana nga Semana Santa agud talwas an mga ini nga magkaka-abot.
Sumala kan Reglos nga sigurado mangud nga damo iton magbabaraktas kaysa ha mga mangangagi nga sarakyan.
Ginmalatumat gihapon han opisyal nga bisan man waray nira sasadhan nga mga karsada ha semana santa, in mayda hira igpapatuman nga mga regulasyon agud nga dire magmasamok ngan magmabug-at iton trapiko.
Nanawagan naman ini ha publiko nga makig-kooperar ha ira buhatan kasumpay hiton ira igpapatuman nga batas-trapiko agud magin maupay iton kiwa hiton trapiko ngan mahimyang iton pagobserba han Holy Week.
