TACLOBAN CITY – Nanindugan hi 4th District Leyte Board Member Carmen Jean Torres – Rama nga diri maraot an political dynasty o adton magkakapamilya nga paprehos nalingkod kumo mga elected officials.
Ini an iya naging mensahe ha iya speech ha inaugural session ha Sangguniang Panlalawigan ng Leyte yana nga adlaw ha atubangan han iya igkasi board member ngan pipira nga mga bisita nga tumambong ha katitirok.
Waray daw kinikita nga sayop an bag-o nga magbaralaud kon mag urupod o kon magkakapamilya an aada ha pwesto kon an panuyo han mga ini in para ha kaupayan han mga molopyo.
“I believe there is nothing wrong with political dynasty for so long as you have compassion for your constituents, you have the vision for your constituents and you always think for the betterment of the province”, an pamayag ni Torres Gomez ha iya inaugural speech.
Mababaruan nga upat nga myembro han pamilya ni Torres- Rama an nagdaug han katatapos pala nga piniliay han May 13.
Nagseserbi kumo re- electionist Congresswoman ha ikaupat nga distrito han Leyte an iya bugto nga hi Lucy Torres Gomez.
An usa pa nga bugto hini nga hi anay Provincial Board Member Matt Torres amo liwat an bag-o nga Mayor han Kananga, Leyte.
Nagdaug liwat ha ikatulo katermino an asawa hini nga hi Ormoc City Councilor Vincent Rama sugad man an bayaw niya nga asawa ni Congresswoman Lucy nga hi Ormoc City Mayor Richard Gomez.
Nagpasalamat naman an bag-o nga board member ha suporta han mga Petilla ha iya kandidatura ngan gintawag pa hini nga iya “idol” hi anay Palo Mayor Remedios “Matin Petilla.”
Nagpahimatngon naman ini nga susuportahan niya an tanan nga programa ni Leyte Governor Mic Petilla ngan Vice Governor Carlo Loreto nga magpapaupay ha bug-os nga probinsiya han Leyte.
