TACLOBAN CITY – Padayon an pangandaman han Technical Education and Skills Development Authority (TESDA) Regional Office 8 ha pag-intra han klase para han mga Balik Probinsya beneficiaries ha rehiyon nga nag-apply para han ira ginhahatag nga skills training ngan scholarship program.
Una hini, an mao nga programa han gobyerno in nagpapanuyo nga mabuligan an mga returning residents nga magbiling hin bag-o nga mga oportunidad para mapadayon an ira pagpapakabuhi mahuman nga manguli ha ira tagsa-tagsa nga mga probinsya tikang ha Metro Manila.
Sumala kan TESDA 8 Regional Director Dante Navarro, maabot ha sobra 40 nga mga benepisaryo han first batch han Balik Probinsya an nag-apply para han mao nga scholarship program.
An mao nga mga benepisaryo in nagpahayag hin interes nga mahibaro bahin han cookery, dressmaking, animal production, auto repair, electronics, air conditioning ngan iba pa.
Ha pagkayana in ginpapamulat nala han mga ini nga magresume an klase ha mga TESDA-owned schools ngan sugadman iba pa na mga kasugbong nga eskwelahan han ira buhatan.
Nahibaruan nga tatagan han TESDA an mga trainees hini hin starter tool kits, personal protective equipment, Internet connectivity allowance, ngan kinada adlaw gihapon nga allowance nga PHP160.
