-- Advertisements --

TACLOBAN CITY – Nagtindog la anay hin temporaryo nga mga stalls an City Government of Tacloban para ha mga paru-paninda nga naapektaran han kasunog han MASA Building dida han nakalabay nga mga semana.

Sumala kan Tacloban City Supermarket OIC Market Superintendent, Recardo Ogardo, mayda na hira natindog nga mga temporary stalls para han mga nagtitinda han kakanin kun diin gin butang ine ha harani ha may dagat ngan gintagan la anay hin mga tent.

Ha pagkayana in ginhihikuman gihapon han ira opisina an pagtindog para liwat han temporaryo nga pi-pwestuhan han mga apektado nga parag-bugas.

Ada ha 38 nga mga temporary stalls an plano nga paghimuon han syudad kun diin an kaurugan hine in igbubutang ha may Quezon Boulevard ngan an pira naman in ha may Tarcela Street.

Gintatalinguha naman nga mahuman an nasabi nga stalls ha masunod nga semana agud makabalhin na an mga paru-paninda ha ira temporaryo nga mga pwesto.

Plano gihapon nga ig board up o ig sarado an nasunog nga parte ngan gubaon an bug-os nga building sanglit kinahanglan nga waray mabilin nga paru-paninda nga napwesto ha building.

Samtang, waray naman babaydan an mga paru-paninda ha ira pag-pwesto ha temporary stalls pero padayon la gihapon an pagbayad han ticket.