Hi Kenneth Savage, usa nga 76-anyos nga magturutdo ha siyensya tikang ha Westbrook High School ha Connecticut, U.S.A., in nagretiro mahuman an pambihira nga 54 years and 249 days nga pagtututdo, ngan nakaghipatik hin Guinness World Record para ha “longest career as a science teacher (male)”.
Nagtikang nga magtutdo hi Savage dida han 1970. Ha sulod han haros lima kadekada, igintutdo niya an magkaduru-dilain nga science subject, kaupod an chemistry, biology, anatomy, physics, marine biology, ngan small animal studies.
Nakilala hiya ha iya creative nga pagpaplano han lesson. Agud tagan hin inspirasyon an iya mga istudyante, nagdadara hiya hin mga buhi nga hayop sugad han raptors, unggoy, ngan an iya sikat nga alaga nga cockatoo nga hi Marshmallow.
An pagreretiro ni Savage hadton Hunyo in iginselebar han iya pamilya ngan mga kaupod ha usa nga dako nga katitirok. Dinhi in gin surpresa hiya han paghatag han Guinness World Records certificate, nga dire niya ginlalauman.
An iya anak nga hi Saran an nagpursige nga makarawat ine han Guinness pinaagi han pagpapadara han mga ebidensya ngan testimonya tikang ha iya mga katrabaho.
Labot ha pagtututdo han siyensya, nagserbi gihapon hi Savage kumo cross country coach, student council advisor, honor society committee advisor, student activities coordinator, ngan mentor ha iba pa science teachers
