TACLOBAN CITY – Nakaghatag hin benepisyo ha 4,333 nga mga indibidwal an Department of Social Welfare and Development (DSWD) Field Office 8 ha gindumara nga pauna nga implementasyon han “Tara, Basa!” tutoring program ha Probinsya han Samar.
Ha nasabi nga ihap, 1,981 an mga incoming Grade 2 students nga ginkukurian pa pagbasa, 1,977 an mga kag-anak han mga kabataan, ngan 350 naman an mga college students nga tikang ha kablas nga pamilya an naka-benepisyo tikang ha nasabi nga programa.
Samtang, nag-deploy gihapon an DSWD hin mga kwalipikado nga estudyante tikang ha Samar State University ngan Northwest State University para magin tutor o Youth Development Workers (YDWs) para magdumara hin reading tutorial ngan Nanay-Tatay sessions para ha mga kabataan ngan han ira mga kag-anak.
Sumala kan Department of Social Welfare and Development Secretary, Rex Gatchalian, panuyo han ira buhatan nga mabuligan dire la an mga elementary students kundi hasta an mga college students nga mayda problema-pinansyal.
Samtang, ha ilarom naman han cash-for-work program han DSWD in kumarawat hin P8,100 an kada student-beneficiary kabalyo han 20-day learning session nga ira ginbuhat tikang han Hulyo 1 ngada han Hulyo 26 han presente nga tuig.
Gintagan gihapon hin P325 nga allowance kada adlaw an mga kag-anak o guardian han mga nakalista ha ilarom han Tara, Basa Progam.
Nagpasalamat naman hin pasasalamat hi Samar Governor Sharee Ann Tan ha implementasyon han DSWD han nasabi nga programa ha Samar.
Ha kabug-osan, nakapag-pagawas hin P12.3 million an DSWD Field Office 8 para han cash-for-work nga programa. (via Bombo Shiela Encio/Zona Libre)
