TACLOBAN CITY– Utro nga nanawagan an grupo han TAMADOTCO, ha lokal nga pangbobyernuhan hiton Tacloban, kasumpay ha anay pagbawal nga makasulod o makabiyahi an para Campetic nga multicab ha downtown area.
Sumala kan Leo Templado, Board of Director and Vice Chairman TAMADOTCO, nga hinaot nira nga makagbu-os hin alternatibo nga pamaagi agud nga dire maapektaran adton mga nagpapakabuhi, sugadman adton mga commuters.
Matungod ha mao nga panhitabo, naghimo hira hin kadagmitan nga kasuratan nga temporaryo la anay makakasulod an mga ine ha downtown area.
Ginpaangbit ni Templado, nababaraka hira yana matungod nga ha ira paghimo han kasuratan in kadagmitan matungod han sitwasyon, nakasulod ha mao nga kasuratan an katugutan nga makabiyahe adton mga tradisyunal jeepney ngan dire aplicable ha mga modernized jeepney.
Naglalaom naman an nasabi nga grupo, nga mapapaghingadayan ine hin maupay hiton konseho han syudad, agud nga magkamayda hin maupay nga resulta, ngan matagan hin pamaagi nga makapagpadayon hira makapamasa ha syudad han Tacloban.
Manunumduman, nagin mapaso nga kontobersya an pagbabawal nga makasulod an Campetic nga multicab ha Tacloban area, kun diin damo an mga tumipa hine.
