TACLOBAN CITY — Nagaandam na an tinaglawas han Talisay Beach para ha ginlalauman nga bulyo han mga mabisita yana nga Easter Sunday.
Sumala kan Talisay Beach Resort Owner, Hon. Rey Caneso, mas ginpahugot nira an koordinasyon ha mga ahensya han gobyerno sugad han Coast Guard ngan kapulisan agud masigurado an katalwasan han mga mabisita o mangangarigo.
May-ada gihapon ma-pwesto nga lifeguard, private staff, barangay tanod hiton beach agud rumesponde ha bisan ano nga insidente.
May-ada gihapon pag-umento han presyo hiton entrance fee mahitungod han natatabo nga krisis ha nasud, mahitungod han kasamok ha Middle East.
Kun an dati in 10-15, maabot na ine yana hin 20 pesos ha mga indibidwal nga 18-anyos pahitaas, samtang an mga kabataan nga ubos ha 18-anyos ngan mga senior citizen in waray na entrance fee.
Samtang, gin-aaghat ni Caneso an mga mabisita ha Talisay Beach nga sumunod ha safety guidelines, likayan iton duro nga pag-inom hin makahurubog nga irimnon, ngan bantayan an ira mga kaupod labi na iton mga kabataan ngan seniors.
Ha kaluyo hiton ginlalauman nga bulyo han tawo, ginsugurado han Talisay Beach nga andam hira maghatag hin talwas, ngan sakto nga serbisyo para ha mga mabisita yana nga Easter Sunday.
