Gindeklara na an Code Blue han Tacloban City Health Office mahuman makitaan hin padayon nga paghitaas han kaso han dengue ha syudad, kadungan han mas ginpahugot nga pangandaman han mga ospital ngan health facilities agud masigurado an dayon nga pagbaton ha mga posible nga madugangan nga pasyente.
Sumala kan City Health Officer Dr. Jaime Opinion nga basar ha ira datos, maabot ha 40% o haros sobra 300 an nahipatik nga kaso han syudad kumpara dida han nakalabay nga tuig.
Labot la ha pagdamo han kaso, nakaghipatik gihapon an surveillance unit han Tacloban City hin clustering han dengue cases ha pira nga barangay, nga nangangaruyag-signgon nga mayda tulo o sobra pa nga kaso ha sakob ha u-usa la nga komunidad.
Ginklaro naman ni Dr. Opinion nga an Code Blue in dire deklarasyon hiton state of calamity, kundi usa ini nga “heightened alert status” nga nagmamando ha mga ospital ngan health facilities nga magin andam ha madagmit nga pagkarawat ngan pagtambal ha mga pasyente nga may sintomas han dengue.
Kasumpay naman hini, ginmalatumat ni Opinion nga nagpagawas na hin direktiba an DOH Eastern Visayas nga mag-abri hin dengue fast lanes an mga ospital ha rehiyon. Dugang hini nga ginpailarum na hin re-training an mga healthcare workers para ha madagmit nga diagnosis ngan panambal ha mga pasyente.
Samtang, nanawagan naman an Tacloban City Health Office ha publiko nga himuon nga regular an paglilimpyo ha karibungan, takpan an mga burutngan han tubig, tanggalon an mga posible ukyan ngan pagbonayan han lamok, ngan dayon pumakadto ha pinakaharani nga health center o ospital kun nakakaabat hin hataas nga haranat, grabi nga pagul-ul han ulo ngan lawas, padurugo ngan iba pa nga sintomas hiton dengue.
