TACLOBAN CITY – Gindig-unan han Tacloban City Government nga nagpapabilin an mandatory wearing of facemask policy ha bug-os nga syudad.
Ini in ha kaluyo han mahugot nga himangrawon ha pagkayana mahuman an pagpapagawas han Cebu government hin executive order nga nagtatanggal na han pagsusul-ot hin facemask ha ira mga molopyo kun diin an mao nga kamanduan in ginkontra naman han Department of Health.
Sumala kan Johannes Dorado, head han Tacloban City DILG, mahugot la gihapon nga igpapatuman han syudad an mga aludayday han city government sugadman tikang ha IATF partikular na an pagsusul-ot hin facemask.
Ini in matungod nga nagpapabilin la gihapon an COVID-19 pandemic ha kaluyo nga humabubo na an mga kaso.
Nanawagan naman ini ha mga molopyo han syudad nga padayon nga magsunod ha mga minimum health protocols labi na yana nga ginlalauman an paghitaas han volume han mga katawhan ha syudad tungod han nagtitikaharani nga kapatrunan han Tacloban.
