TACLOBAN CITY – Ginpahayag han Leyte Metropolitan Water District (LMWD) nga waray sadang igkabaraka an mga konsumidor hini mahitungod nga nagpapabilin nga supresyente an suplay han tubig ha kaluyo han hulga han El Niño phenomenon.
Sumala kan JP Go, tagapagyakan han LMWD, sadang an water level han ira water source ngan waray pa hira namomonitor nga pag-ubos hini.
Padayon gihapon an ira pagbabantay in kaso magkaada hin senyales hin pag-ubos han lebel han tubig mahitungod han katmara agud nga magkaada dayon hin adjustments ngan contingency plan.
Samtang, ginpahayag gihapon hini nga waray sadang ikabaraka ha suplay hin tubig ha northern barangays han Tacloban o mga relocation sites mahitungod nga padayon gihapon an ira pagdeliver hin tubig para ha mga residente.
Ada na gihapon ha construction period an water project para ha northern barangays kun diin naghimo na hin project management unit an LMWD nga nagmomonitor ha trabaho han ira contractor.
Ini naman an ginhihingita nga solusyon agud nga magkaada na hin panmaiha nga suplay hin tubig an mga biktima han Supertyphoon Yolanda nga nag-uukoy ha mga relocation sites.
