TACLOBAN CITY – Samaran an usa nga sundalo a ginbuhat nga harassment han gintutuuhan mga miyembro han NewPeople’s Army (NPA) ha tropa han 87th Infantry Battalion ha Brgy. Can-aponte San Jose de Buan, Samar.
Sumala kan Capt. Reynaldo Aragones, Chief Division Public Affairs han 8th Infantry Division, nagdudumara hin community support program an tropa han 87th IB han tigda nala ini nga pauranan hin bala han rebelde nga grupo.
Nagresulta naman ini ha usa nga sundalo nga samaran nga hi Pvt. Ronald Alutang, Jr. nga ha pagkayana in nagpapaupay na ha ospital.
Sumala ha report, waray may nahipatik ng casualty o samaran ha panig han mga rebelde.
Samtang, mahugot naman nga ginkondena han mga militar an mao nga insidente kun diin ini daw in pagpapamatuod nga waray kahadlok ngan desperado na an rebelde nga grupo nga kontrahon an tropa han gobyerno bisan kun maaram hira nga damo nga mga sibiliyan ha komunidad an maapektaran.
Ha pagkayana in padayon an gindudumara nga hot pursuit operation han mga otoridad ha mao nga lugar.
