ODD — Usa nga grupo hin archeologists tikang ha usa nga unibersidad ha Amerika an nagpahayag na an higante nga hi Goliath, in pupuydi nga gutiay la an kahataas ha mga modern-day NBA players.
Sumala ha mga archeological findings han mga eksperto ngan researchers han Brigham Young University ha Utah, ada ha 7feet ngan 10 inches an kahataas han higante nga ginpirde ni David ha Bibliya.
Gutiay la an kahataas hini kun igkukumpara ha gintagurian nga pinakahataas nga basketball players ha kasaysayan han NBA nga hira Manute Bol ngan Gheorghe Muresan nga pareho nga may height nga 7 feet ngan 7 inches.
Umabot ha konklusiyon an mga eksperto ngan researchers nga ini an height ni Goliath mahuman suklon an mga istruktura han siyudad han Gath nga nahalungkat han mga archeologists dida han 2018 ha Tell es-Safi, Israel.
Sumala kan Jefferey Chadwick, head archaeologist han mao nga unibersidad, usa ha mga ginpagbasehan nira han kahataas ni Goliath an naukab nga gateway han daan nga siyudad nga may 2.38 meters an kahataas.
