TACLOBAN CITY: Nagpatuman na hin State of Calamity an lokal nga pang-obyernohan han Allen Northern Samar, kasumpay na gihapon ine han nakalabay nga bagyong Enteng.
Sumala kan Information Officer, Office of Civil Defense Regional 8, Sher Rysia Saises, usa la an nagpasa hin deklarasyon nga magpapatuman hin State of Calamity, ngan ha pagkayana partial report pala an kapot han ira buhatan.
Dugang pa hine, subay ha ira inisyal nga datos maabot ha 10 nga mga panimalay an totally damaged, samtang 14 naman nga panimalay an partially damaged, ngan ginlalauman naman han ira buhatan nga madudugangan pa ine ha mga masunod nga adlaw, matungod padayon pa an gindudumara nga imbestigasyon ngan assestment han mga sangay han gobyerno ha nasabi nga kalamidad.
Ginmalatumat pa hine, nga ha pagkayana 2 pala an ira nare kober nga casualties, ngan an mga ine an taga-Biri Northern Samar, ngan padayon pa an pamiling han duha nga parupangisda nga gindeklara nga missing ha Borongan City Eastern Samar, han kasagsagan han bagyong Enteng.
Ha lain nga bahin, padayon naman an pan distribwer han relief goods hiton ira buhatan, kaupod na an Department of Social Welfare and Development (DSWD) Region 8, ha mga nadarahigan han bagyo.
Maabot naman ha sobra 400 nga mga hygiene kit an naipanhatag na , samtang ada naman ha 1,700 family food packs an naipanhatag na han DSWD-8.
