NATIONAL – Gin ayat ni House Speaker Martin Romualdez hi Vice President Sara Duterte nga ig eksplikar an daw sayop nga paggamit han P612.5 million nga confidential funds han OVP ngan Department of Education.
Ha iya mensahe ha plenaryo kakulop nga adlaw, bumwelta hi Romualdez kan Duterte kahuman han tarhug han bise-presidente nga mayda na daw ine nakaistorya nga mapatay kanda Presidente Bongbong Marcos ngan First Lady Liza Araneta-Marcos.
Sumala kan Speaker Romualdez, makababaraka an pahayag ni VP Sara ngan delikado labi na nga dire ine normal nga pahayag kundi direkta nga tarhug ha demokrasya, ha gobyerno, ngan ha seguridad han nasud.
Gin depensaran gihapon hine an Kamara kontra ha mga pag-atake ngan breach of protocols nga ginbuhat han bise-presidente ngan nanawagan ha mga kaparehas magbabalaod nga proteheran an integridad han institusyon.
Waray daw basaranan an mga alegasyon nga ginpapatumba o ginmamaraot niya hi Duterte mahitungod ha ambisyon ha pulitika ha tuig-2028 ngan maikokonsidera daw ine nga desperado nga pitad agud maihirayo an tinuod nga isyu.
