TACLOBAN CITY – Gindidire na ha pagkayana pagsulod ha probinsya han Southern Leyte an mga poultry products tikang ha pira nga mga rehiyon ngan probinsya ha nasud.
Ini in kasunod ha ginpalusad nga Executive Order No. 13 han Southern Leyte provincial government kun diin ginmamando hini an pagbabawal han pagpasuldo ha ira probinsya han mga poultry products tungod ha hulga han avian influenza o bird flu.
Sumala kan Daniel Maturan, media officer han Southern Leyte province, dire na gintutugot an pagpasulod ha ira probinsya han mga poultry products tikang ha Region 1, 2, 3, 4, 5 ngan Cordillera Administrative Region (CAR).
Dire naman ini makakaapekto ha suplay ngan demand han poultry products ha Southern Leyte tungod nga mayda ini kalugaringon nga productions ngan nakuha gihapon an ira probinsya hin suplay tikang ha Cebu, Mindanao sugadman tikang ha Ormoc ngan Maasin dinhi ha rehiyon.
