TACLOBAN CITY – Nagpagawas hin kasinahon ni Tacloban City Mayor Alfred Romualdez kasumpay han nahitabo ha Yolanda Housing Project ha syudad han Tacloban.
Sumala pa hine, ha sobra 14,000 nga mga pabahay nga waray pa higagamiti in sobra katunga pa hine an kinahanglan aydun agud maukyan han mga residente, ngan waray pa daw gihapon ine kahi-turnover ha iya administrasyon.
An igin turnover la daw ha iya dida han nakalabay nga administrasyon in an mga karsada nga common spaces nga ginbutangan liwat hin mga iskuylahan.
Dugang pa hine, dida han nakalabay nga administrasyon, gintalinguha niya nga aruon ngan igpa-turnover ha lokal nga pangobyernuhan han syudad ine nga mga pabahay agud ma-ayad ngan matikangan pag-ukyi han mga benepisyaryo pero waray gud ine ighatag ha iya.
Ha lain nga bahin, nanawagan naman ine ha mga residente nga dire igbaligya an mga pabahay nga naka-ngaran na ha ira ngan dire himuon nga 2-storey an mga balay mahitungod nga pag-abot hiton assessment in mas mahal an babaydan nga buwis han mga ine mahitungod nga duha ka-andana naman an mga balay ngan igkokonsidera ine nga bale duha ka-balay.
Samtang, gintagan-duon gihapon hine nga waray hiya ginsasayop ha nahitabo nga kapabayaan kundi ginpapahibaro la hine an nahitabo dida han mga nakalabay nga administrasyon nga nagresulta han waray pa katu-turnover nga mga pabahay ha mga benepisyaryo. (via Bombo Niña Magpili)
