Iginpagawas han Department of Energy (DOE) an ira survey kun diin 70% han mga Pilipino daw an pabor ha paggamit han nuclear energy kumo kaparte han pagkukuhaan han enerhiya ha nasud.
An survey in gindumara han Social Weather Stations (SWS) tikang han Mayo 6-24, 2024 ha 7,520 adult respondents. Nagawas nga natuod an kadam-an nga makakabulig an nuclear power ha paghahatag hin kuryente, pag-iban ha pag-angkat han lana, paghimo hin trabaho, ngan pag-solbar ha climate change.
Dako daw gihapon an suporta hine ha mga proyekto nga may paghisumpay ha nuclear power kun diin nakakarawat hin +66 net approval rating an rehabilitasyon han Bataan Nuclear Power Plant, samtang +45 naman an sumuporta ha pagtutukod han bag-o nga planta.
Sumala kan Energy Secretary Sharon Garin, dako nga pitad ine para ha energy transition han nasud.
Iginpahayag gihapon han DOE nga 76% han mga ginpamakianhan an karuyag mahibaro pa kasumpay ha nuclear energy pagpamatuod daw han panginahanglan hin mas haluag nga public education.
Nabaruan nga an resulta han survey in kadungan han pagpasa han Philippine National Nuclear Energy Safety Act ngan pangandaman para ha Philippine International Nuclear Supply Chain Forum (PINSCF) 2025 nga pagbubuhaton ha maabot nga Oktubre 2–3.
