TACLOBAN CITY -Nakaghipatik hin 3,489 nga kaso hiton dengue an Department of Health Eastern Visayas han nakalabay nga tuig.
An nasabi nga ihap in hamubo kumpara han tuig 2024, nga umabot hin 15,669 an ihap han mga kaso hiton nagpositibo han dengue.
Sumala kan Leonido Olobia – Program Manager DOH 8, ha kaluyo nga hamubo an ira nahipatik, gin-aaghat la gihapon an publiko nga dire magpakampanti, lugod batasanon nga magin vigilante ha tanan nga higayon.
Dugang pa hine, 6 an naitala nga patay ha Eastern Visayas han nakalabay nga tuig, ngan an mga ine in tikang ha Quinapondan Eastern Samar, Macrohon Southern Leyte, Mondragon, Catarman ngan Laoang Northern Samar.
Mas hamubo gihapon ine nga ihap kumpara han tuig 2024, kun diin nakaghipatik an ira buhatan hin 27 nga naawat han kinabuhi, matungod han mao nga sakit.
Usa ha mga sintomas han dengue amo an hataas nga hiranat, pagsasait hiton kalawasan, pamumula hiton panit, ngan pagsusuka pasintabi ha mga na ngangaon.
Sanglit padayon an pag aghat han DOH-8 ha publiko, nga kun may makikita nga naka stock nga tubig ha mga surudlan siguraduhon nga mayda ine taklob, ngan ig huwad an may mga naka stock nga tubig ha libong nga posible bonayan hiton mga lamok.
