NATIONAL – Nag-deploy an Metropolitan Manila Development Authority (MMDA) hin kabug-usan nga 2,500 nga traffic personnel kumo pangandaman ha ginlalauman nga pagbug-at han trapiko samtang nagkakabalik an mga biyahero ha Metro Manila mahuman an Semana Santa.
Sumala kan Charlie Nosares han MMDA Metrobase, waray pa nasipatan nga mabug-at nga traffic o aksidente ha mga pangunahon nga karsada ha syudad han Manila, bisan paman kun mayda gindudumara nga roadworks ha parte han C-5 Road ha Pasig ngan Mindanao Avenue ha Quezon City.
Sugadman, bisan kun nagpapabilin nga haluag an mga kakarsadahan in ginpahimatngunan la gihapon an mga motorista nga maghinay ha pagbibiyahe.
Ginlalauman naman han MMDA nga magtitikang an pagbug-at han trapiko yana nga adlaw han Lunes, ha pagbalik han mga biyahero tikang ha probinsya.
