NATIONAL – Gin anunsyo han Philippine Drug Enforcement Agency (PDEA) nga drug-cleared na an kabug-usan nga 29,390 tikang ha 42,002 nga barangay ha nasud.
An mga drug-cleared barangays in mga dati nga apektado han ilegal nga droga nga ginpailarom ha Barangay Drug Clearing programa ngan gindeklara nga cleared na tikang ha bawal nga droga.
Ha iginpaangbit nga accomplishment report han ahensya, ginmalatumat ni PDEA Director General Isagani Nerez nga ada ha kabug-usan nga 320 nga lugar ha nasud an iginkokonsidera nga “unaffected” o mga barangay nga waray mga indibidwal nga drug user, drug pusher, drug den maintainers, ngan iba pa nga illegal drug activities.
Nahipatik gihapon han PDEA nga ada ha 6,179 nga mga barangay an gindeklara kumo drug-free na, karuyag sidngon, an mga lugar nga ine in dire apektado nga barangay nga nakumpirma han Oversight Committee on Barangay Drug Clearing.
Pero nahipatik gihapon han ahensya nga mayda kabug-usan nga 6,113 nga barangay la gihapon an iginkokonsidera nga apektado han ilegal nga droga.
