ODD NEWS- Usa nga bag-o nga species han sinauna nga marine reptile nga gintatawag nga Xiphodracon goldencapsis o “sword dragon” an nadiskubrehan ha England, subay ha pag-aram naipagawas ine ha Papers in Palaeontology han Oktubre 2, 2025.
An bag-o nga nadiskubrehan in kalakip ha mga ichthyosaur—mga dambuhala nga reptile nga nabuhi ha dagat hadton Early Jurassic era, nga ginbabana-bana nga ada ha 190 milyon katuig na an nakakalabay.
Natad-an an bukog hine hadton 2001 ni propesyonal fossil collector Chris Moore ha Golden Cap han Charmouth, kaparte han kilala nga “Jurassic Coast” han England nga riko ha deposito han mga fossil.
Subay ha mga researcher tikang ha University of Manchester, haros perpekto nga napreserba an fossil, kalakip na an bungo nga mayda dako nga eye socket ngan halaba nga baga-baga hin espada nga nguso—sanglit ginbansagan ine nag “sword dragon.”
Nakit-an han mga siyentipiko nga kakaiba ine ha ichthyosaur matungod nga lidog an buho han irong hine ngan gugtiay an ngipon, nga nagpapasabot nga nakaon ine in maghumok nga hayop sugad hiton pusit ngan gugtiay nga isda.
Ginbabana-bana naman han X.goldencapsis nga mayda ine kahilaba nga 10ft. Iginkokonsidera naman ine nga sinauna nga reptile tikang ha Pliensbachian period.
