TACLOBAN CITY – Nanawagan an Simbahang Katoliko ha publiko nga magsunod ha mga health protocols nga igpapatuman buwas nga adlaw kadungan han pagsalin-urog han Ash Wednesday.
Sumala kan Fr. Gilbert Urbina, kura paruko han Palo Cathedral, may mga pagbabag-o nga igpapatuman han singbahan ha pagtigaman han Ash Wednesday tungod han COVID-19 pandemic.
Imbes nga igpapahid o igkukrus ha agtang an agbon o abo, igbubudbod nala ini ha ulo o di man ngani ha alimpupuro han tawo.
Limitado la gihapon an mga maniringba nga makakasulod ha singbahan nga nasusubay ha gintutugot nga kapasidad.
Ha kaluyo han mao nga mga pagbabag-o, in nanawagan gihapon an Simbahang Katoliko ha publiko nga dire mangalimtan an pinakatumong han pagtigaman han Ash Wednesday labi na kumo tinikangan han kwaresma ngan pagpamalandong ngan pagbasul han mga kasal-anan han tawo.
