Gin sigurado han Department of Foreign Affairs (DFA) nga magpapabilin nga abri an ira kumunikasyon para ha publiko, partikular ha mga nanginginahanglan hin bulig nga Overseas Filipino Workers (OFWs), kadungan han pormal nga pagtitikang han ira adjusted work schedule.
Ini in mahuman nga igpatuman han ahensya an 4-day on-site work schedule para ha ira mga empleyado tikang Lunes kutob Hwebes. Samtang, igpapatuman naman an Work From Home (WFH) o off-site remote work arrangement kada adlaw han Biyernes.
An pagbabag-o han schedule han trabaho han DFA in direkta nga pagsunod ha kamaduhan ni Presidente Ferdinand Marcos Jr. ha ngatanan han buhatan han gobyerno nga magpatuman hin mga kaangayan nga pitad agud makatipid ha konsumo han enerhiya han nasud.
Ha kaluyo han kawaray empleyado ha opisina kada Biyernes, gin klaro han buhatan nga padayon nga makarawat hin tawag an ira trunkline.
Ginpapahibaro an mga pamilya han mga OFW ngan an publiko nga pwede tumawag ha Office of the Undersecretary for Migrant Affairs ha numero nga 8-834-4000 local 4031.
Labot pa hini, pwede gihapon igpaagi an mga pakiana ngan pag-aro hin bulig pinaagi han pagpapadara hin mga mensahe ha ira opisyal nga email nga ofhelpdesk.atn@dfa.gov.ph.
