BARUGO, LEYTE – Mas gin pahusay ngan gin paupay pa an serbisyo-panlawas nga ginhahatag han bungto han Barugo ha mga nasasakupan hine.
Labot la han pagkakamay-ada hin kalugaringon nga ospital, in mayda na gihapon an Barugo Municipal Hospital gintatawag nga “Specialty Clinic”—kun diin may-ada mga espesyalista nga mapakadto ha ira bungto usa ngada ha duha kabeses kada bulan o depende han kadamo han mga nanginginahanglan han nasabi nga serbisyo.
An Specialty Clinic in naghahatag hin libre nga serbisyo-medikal ha mga residente nga nagkikinahanglan hin pagtambal o pagkunsulta.
Sumala kan Barugo, Leyte Mayor Dr. Aron Balais, nabug-os an nasabi nga inisyatiba mahitungod nga damo han mga residente han Barugo an napakadto pa han Tacloban para la magcheck-up ha mga espesyalista o eksperto ha medina kun diin haros alas-6 pala han aga o mas timprano pa in nalakat an mga magpapa-check up ha ira panimalay para bumiyahe, ngan pag-aabot ha ospital labi na ha EVMC in naghuhulat pa utro an mga ine in maiha nga oras, nga nagreresulta hin haros dako na nga gab-i nakakauli an mga ine.
Pinaagi han Specialty Clinic, dire na kinahanglan kumadto ha Tacloban han mga residente nga ginre-refer han ira ospital ha mga ospital ha Tacloban, mahitungod nga an mga espesyalista na mismo na makadto ha ira para maghatag han ira kinahanglan nga serbisyo.
Sumala pa kan Dr. Balais, dako an mahibubulig hine nga inobasyon mahitungod nga labot la nga dire na mapahirayo an mga Barugon-on ha pagpakonsulta in makakaminus pa ine ha gastos ha pamasahe ngan pagkaon dara nga harani namanla an ira lalakton o sasakyon.
Dida naman han Agosto 10 in nakadto naman an para han Psychiatry ngan OB-Gyne.
Mayda gihapon hira ginhuhulat nga mga espesyalista para naman ha Surgery, Internal Medicine, Pediatric, Orthopedics, ngan espesyalista ha mata.
Samtang, plano gihapon han nasabi nga bungto nga magtukod hin kalugaringon nga dialysis center mahitungod han nagtitikadamo nga ihap han mga nagda-dialysis ha ira lugar.
