Iginduduso nira Senador JV Ejercito ngan Senador Risa Hontiveros an dayun nga pagpasa han Senate Bill No. 2 o Masterplan on Infrastructure and National Development (MIND) Act, nga panuyo himuon nga mas maupay, transparent, ngan panmaihaan an pagpapatuman han mga proyekto ha imprastraktura.
Sumala kan Ejercito, makakabulig an panukala agud mapalaksi an pag-ursa han magkadiru-dilain nga rehiyon, makahimo hin mas damo nga trabaho, ngan malikayan an mga iregularidad ha pagpili ngan pagpapatuman han mga infrastructure projects.
Dugang pa, sisiguraduhon han panukala nga magpapadayon an importante nga infractracture projects bisan pa kun magbalyo an administrasyon.
Panuyo gihapon han MIND Act nga tanggalon an last-minute budget insertions ha bicameral conference committee ngan tagan hin mas dako nga papel an mga lokal nga pangobyernuhan ngan regional development councils ha pagtudlok han mga prayoridad nga proyekto ha ira lugar.
Samtang, ginmalatumat ni Hontiveros nga importante an pagkakamay-ada hin usa nga komprehensibo nga masterplan agud malikayan an mga dire kinahanglan, mahal, ngan kwestyunable nga proyekto.
Dugang pa hini, kun waray klaro nga plano, magigin masamok an paggastos han pondo han gobyerno ngan posible nga dire mabton an tiuod nga panginahanglan han mga kumunidad.
Ha ilarom han panukala nga balaod, magbubug-os gihapon hin panmaihaan nga infrastracture plan nga magseserbi nga giya ha gobyerno ha pagpili, pagpapatuman, ngan pagmomonitor han mga pangunahon nga proyekto ha bug-os nga nasud.
